Гласање на иселениците: Спремни да изберат претседател од 24 земји

Можност да заокружат еден од седумте кандидати за претседател ќе имаат и иселениците, иако поради слабиот одѕив за гласање, ќе гласаат само за претседател.

Прифатени се пријавите на само 2681 наш иселеник, но сепак гласање ќе се организира во 24 земји. Пресметките на трошоците ќе се прават дополнително, но проценките се дека веројатно ќе се потрошат околу еден милион евра за да се организира гласањето, како и за престојот во странство на избирачките одбори во кои членуваат десет лица.

Во подалечните држави, како на пример Кина, каде се пријавени само 12 лица за гласање, цел избирачки одбор ќе треба да престојува две недели на државен трошок.

Најголем интерес за гласање покажале Македонците во Германија, 594, додека во Црна Гора нема ниту еден пријавен. Во Словенија ќе гласаат 338, во САД 244, во Канада – 124, во Австрија – 119, во Италија – 104, во Австралија 97. Во државите каде има под 10 пријавени, нема да се гласа.