
Српското Обвинителство за организиран криминал го замрзна имотот на сопственикот на „Алта банка“, Давор Мацура, како и на неколку компании поврзани со него. Мерката опфаќа недвижнини, земјиште и деловни објекти, вклучително и околу 35 хектари градежно земјиште што му припаѓало на поранешниот комбинат за трактори ИМТ во Нов Белград.
Оваа информација ја објави истражувачката мрежа „Инсајдер“ (Insajder), повикувајќи се на документација до која дошле нивните новинари. Во Северна Македонија, пак, продолжуваат политичките обвинувања поврзани со случајот „Алта банка“.
Во четвртокот, коалицијата ВЛЕН побара оставка од лидерот на ДУИ, Али Ахмети, поставувајќи прашања за наводни финансиски врски помеѓу компании поврзани со неговиот семеен круг и „Алта банка“. Од ДУИ, сепак, тврдат дека актуелната влада лажно и неосновано се обидува да ја поврзе партијата со влезот на „Алта банка“ во земјата.
Обвинувањата продолжија и во македонскиот политички блок. СДСМ поднесе кривична пријава против гувернерот Славески, како што претходно најави лидерот на партијата, Филипче.