ЕУ останува стратешка определба на земјата, но процесот на проширување мора да се темели на исполнување на критериумите и постигнатите резултати, а не на билатерални спорови – истакна премиерот Мицкоски на заедничката прес-конференција со амбасадорот на ЕУ, Рокас, одржана во четвртокот по повод Извештајот на Европската комисија за напредокот на Северна Македонија.
Мицкоски нагласи дека членството во ЕУ носи конкретни придобивки за земјата. Сепак, тој повтори дека ставот на Владата во однос на прашањето за уставните измени останува непроменет, како и дека земјата очекува европскиот пат да се заснова на принципи и на спроведување реформи.
Амбасадорот Рокас изјави дека Северна Македонија покажува оти е доверлив партнер на ЕУ, кој ги споделува нејзините стратешки приоритети. Според амбасадорот на ЕУ, сега е моментот земјата да ги искористи можностите што ги нуди европската перспектива и да продолжи со напорите за исполнување на реформските приоритети.