Во вторникот, Агенцијата за национална безбедност и Министерството за внатрешни работи соопштија детали за операцијата спроведена во понеделникот.
Извршени се претреси кај шест лица на вкупно 12 локации во Скопје, односно во Чаир и во селата Сингелиќ и Брест, при што се одземени автоматски пушки, рамки за автоматски пушки, снајперска пушка, рамка за снајперска пушка, пиштоли, муниција од различен калибар, тактички елек, радиостаници, официјално знаме на терористичката организација ИСИС, големо количество електронски уреди и мобилни телефони, како и значителна сума парични средства во денари и странска валута.
Според Агенцијата за национална безбедност, станува збор за верска радикална група поврзана со транснационални криминални организации, која се поврзува со дела на насилство, изнуда, киднапирање, лихварство, недозволена трговија со дрога, трговија со оружје и други криминални активности.
Според Министерството за внатрешни работи, 34-годишниот К.И. бил поврзан со огранок на ИСИС со цел вршење кривични дела на територијата на Северна Македонија.