ВМРО-ДПМНЕ ги отфрли обвинувањата на СДСМ во врска со „АТС Груп“ и лобирањето во САД.
Во соопштението, иронично беше посочено дека СДСМ си дал „автогол“. Во таа насока, владејачката партија праша дали СДСМ мисли на истата таа „АТС Груп“ чии производствени капацитети беа свечено пуштени во употреба од поранешниот премиер Заев, заедно со Радмила Шекеринска.
Според ВМРО-ДПМНЕ, токму Заев му доделил дипломатски пасош на сопственикот, Шефшет Демировски, и покрај обвинувањата за шпионажа, додека високи функционери на СДСМ редовно ја одликувале компанијата со ордени и активно го поддржувале нејзиното учество на тендери на НАТО.
Сепак, од СДСМ порачаа дека ВМРО-ДПМНЕ не може да избега од документите.
„ВМРО-ОЦГ вели: актуелната влада нема никаква врска со приватен договор меѓу две компании. Ако нема никаква врска, зошто во платениот текст се спомнува името на измамникот Мицкоски? Зошто договори за енергетика, ЛНГ, ИТ, одбрана?“, прашаа тие.