Во врска со реакциите на одлуката за затворање на случајот со модуларните болници, Обвинителството за гонење на организиран криминал и корупција соопшти дека останува на својот став да не коментира политички изјави.
На прес-конференцијата на 19 август, шефот на Обвинителството, Ислам Абази, нагласи дека решението за затворање на предистражната постапка не е конечна одлука, како и дека доколку во секој момент се појават нови информации или докази, случајот може повторно да се отвори.
Се постави и прашањето дали може да се поднесе жалба до Вишото јавно обвинителство и, доколку е така, кој може да го стори тоа. Пред неколку дена, Обвинителството објасни дека нема страна која има право да поднесе жалба бидејќи случајот е отворен врз основа на гласини, а не врз основа на конкретна кривична пријава, како и дека не е утврдена штета.
Апсолутниот рок на застарување во врска со злоупотреба на службена положба согласно измените на Кривичниот законик од 2023 година е 10 години.