Водата од водоводот во Гостивар сè уште не е за пиење, останува да се употребува како техничка, изјави попладнево на прес-конференција министерот за внатрешни работи Панче Тошковски, по состанокот на Главниот штаб за кризи што тој го предводи.
Како што рече, договорено било како ќе се одвиваат следните испитувања и дека тие ќе бидат почести, односно ќе се зголеми континуитетот на мерења на клвалитетот на водата од страна на повеќе институции.
Водата ќе биде прогласена за безбедна за пиење штом ќе има три последователни резултати што покажуваат дека водата е безбедна на сите мерни точки низ градот.
Сепак, од СДСМ соопштија дека кризата со водата во Гостивар станала здравствена катастрофа. Во таа смисла, забележаа дека сè било блокирано во Општата болница во Гостивар, додека пациенти од тој град дури биле однесени во Тетово за операции, како и за породувања.