Во врска со патот кон ЕУ, во интервјуто за Канал 5 во четврток, претседателката Силјановска Давкова изјави дека останува оптимист, иако во сегашните околности и со спроведените уставни измени, има простор за ново вето од Бугарија поради Вториот протокол меѓу двете земји.
Според неа, иако ЕУ не може да обезбеди гаранции, таа поседува механизми за спречување на идно вето за идентитетски прашања. Таа изјави дека на 30 септември ќе има појасна слика за европската иднина на земјата. Силјановска Давкова очекува планот на европските институции во врска со текот на проширувањето да биде објавен тогаш.
Таа се осврна и на коментарите на амбасадорот на ЕУ, Рокас, за работата што се врши под радарот.
„Точно е, така е, кажувам дека под радар да, да. Некогаш не се кажуваат работите. Јас кога не би била оптимист не би била претседателка, оптимист сум, верувам во добра волја“, рече таа.