На шест лица им е изречена мерка притвор, на четири им е одреден куќен притвор, а на девет им се изречени полесни мерки на претпазливост по случајот за нелегален увоз и дистрибуција на ботокс и филери во Скопје, Струмица и Битолa.
Доцна во петокот навечер, Кривичниот суд одлучи за мерките, откако ги сослуша сите осомничени. Истрагата опфаќа вкупно 19 лица осомничени за злосторничко здружување, повреда на права од индустриска сопственост и неовластено користење на туѓа фирма и примање поткуп. Обвинението опфаќа и шест правни лица.
Меѓу уапсените се лекари од Градската општа болница „8 Септември“ и Клиниката за дерматологија, како и сопственици на приватни дерматолошки ординации и лица кои организирале транспорт и дистрибуција на нелегално увезени материјали.