Министерот за надворешни работи и надворешна трговија Тимчо Муцунски откри дека на 7 април во Вашингтон ќе се одржи сесија на Стратешки дијалог меѓу Северна Македонија и САД, а во националната делегација ќе бидат тој самиот како шеф, како и министерот за внатрешни работи Панче Тошковски, министерот за одбрана Владо Мисајловски, министерот за дигитална трансформација Стефан Андоновски и министерката за енергетика Сања Божиновска.
„Со ова, ќе станеме првата земја во Европа што има ваква сесија со сегашната американска администрација. Ќе отвориме сериозни дискусии за одбраната и безбедноста, како и за енергетиката и трговијата, и за многу други области каде што можеме да донесеме придобивки за нашите граѓани“, рече Муцунски.
Премиерот Христијан Мицкоски рече дека очекува „плодни и многу успешни резултати“ од стратешкиот дијалог. Тој нагласи дека владата води принципиелна надворешна политика, а не „клекнување на милост“ и го потврди партнерството на САД.