Централниот одбор на СДСМ одржа седница во среда каде што избраа нови членови на раководните тела на партијата, информираат од партијата.
За членови на Централниот и Извршниот одбор се избрани Соња Стаменкова, Слободен Чокревски, Богданка Кузеска, Тања Илијовска и Рубин Земон.
За меѓународен секретар на партијата е именуван Андреј Жерновски, додека за втор организациски секретар е избран Зоран Трифуновски. Дополнително, партијата распиша оглас за избор на претседател на Форумот на пензионери.
Лидерот на партијата Венко Филипче ја презентираше новата предлог-платформа на СДСМ од која ќе произлезе новата програма на партијата. На седницата е одлучено и 32. програмски Конгрес да се одржи на 7 јуни.
Претходно истиот ден, во интервју за Телма, Филипче рече дека сè повеќе се открива дека премиерот Мицкоски е заменик-руски играч и во земјата и во регионот. Во таа смисла, истакна дека премиерот и неговиот кабинет ја ставиле земјата во скутот на Унгарија.