Според претседателката на Здружението за кривично право и криминологија на Македонија, професорката Александра Груевска Дракулевски, носењето на законот за помилување треба да оди паралелно и со измени на КЗ, односно измена на одредбата која се однесува на помилувањето, член 114.
„Клучната измена во овој предлог закон за помилување е тоа што се укинува аболицијата, што значи дека Претседателот на државата ќе може да дава помилување само на правосилно осудени лица, но не и во делот на кривично гонење“, изјави Дракулевски.
Претседателката на државата Гордана Сиљановска Давкова на научно-стручната расправа посочи дека трендот во ресоцијализацијата оди рака под рака со осовременувањето и очовечувањето на условите во затворите.
Универзитетскиот професор и поранешен член на Комисијата за помилување, Гордан Калајџиев укажа дека и претходно немало во законот групно помилување, но сепак се нашло начин истото да се спроведе. Според Калајџиев потребна е одредба, во спротивно оваа практика не ја исклучува можноста за извор на корупција.
Целта на новиот предлог-закон за помилување е да обезбеди јасна, транспарентна постапка на помилување, предвидени пократки рокови за постапување на надлежните институции кои треба да ги прибираат соодветни податоци пред да стигнат во кабинетот на Претседателот.