Во Минхен, премиерот Мицкоски, заедно со министерот за надворешни работи Муцунски, во саботата се сретна со специјалниот претставник на американскиот претседател Трамп, Гренел.
„Стратешките односи со САД се камен-темелник на нашата стабилност и економски развој. САД остануваат наш најголем поддржувач и стратешки партнер.
Во време на глобални предизвици, зајакнувањето на ова партнерство е од клучно значење за нашата национална безбедност и економски напредок. Градиме партнерство засновано на меѓусебно почитување, економска соработка и заедничка посветеност на мирот и стабилноста“, рече премиерот на социјалните мрежи во саботата.
Исто така, Мицкоски се сретна со холандскиот колега Шуф, при што разговарале за можноста за поголема соработка, како и за патот на Македонија кон ЕУ и поддршката од Холандија.
Исто така, на тркалезна маса насловена како „Отворена врата или отворен крај? Исполнување на проширувањето на ЕУ“, Мицкоски ги презентираше, како што рече, позициите на Македонија за проширувањето.
Како што оцени, на земјата и нејзиниот регион не им е потребен бесконечен процес, туку заслужена и предвидлива иднина.