Британските весници „Тајмс“ и „Дејли меил“ минатиот петок објавија дека барателите на азил на кои ќе им биде одбиен азил во Обединетото Кралство ќе бидат депортирани во Северна Македонија, додавајќи дека официјално Скопје преговара со Лондон за можноста за формирање центар каде што ќе бидат прифаќани одбиени баратели на азил, по што тие можат да изберат или да останат во Северна Македонија и да бараат вработување во сектори каде што недостасува персонал, или да ја напуштат земјата.
Во текстовите се додава и дека Велика Британија ќе ѝ плаќа на Северна Македонија за прифаќање на барателите на азил. Од Владата во Скопјe ги негираа тврдењата, отфрлајќи ги како текстови за внатрешна политичка употреба.
„Единствената вистина за ова ја кажа британскиот амбасадор во Скопјe, Метју Лосон, уште во мај 2025 година, кога јасно изјави дека Северна Македонија нема да прифаќа нелегални мигранти од Велика Британија“, соопшти владата во соопштение за медиумите.
Одговорија и ВМРО, откако опозициската партија СДСМ побара од владата да каже што се договориле со Велика Британија.
„Да бидеме јасни, за доброто на јавноста: Македонија нема, не планира и не преговара за отворање на никакви кампови за мигранти“, соопштија од ВМРО-ДМПНЕ.
Пратеникот на ВМРО-ДМПНЕ, Антонио Милошоски, ги отфрли тврдењата на опозицијата и додаде дека британскиот амбасадор потврдил дека не постои таков план, истакнувајќи дека билатералниот стратешки договор опфаќа инвестиции во инфраструктура, образование и одбрана, но не и кампови.
Милошоски нагласи дека соработката на Велика Британија со балканските држави се фокусира на борба против нелегалната миграција преку механизми комплементарни на Фронтекс. Од Британската амбасада во Скопје, пак, издадоа соопштение преку своите профили на социјалните мрежи, во кое информацијата не е ниту потврдена, ниту демантирана.
„По клучната средба меѓу премиерите Стармер и Мицкоски во мај, Обединетото Кралство и Северна Македонија воспоставија Стратешко партнерство фокусирано на долгорочна политичка, економска и безбедносна рамка дизајнирана да ја продлабочи соработката и да ја зајакне стабилноста и просперитетот во двете земји. Како дел од ова, Велика Британија и Северна Македонија потпишаа партнерство меѓу владите за реализација на критични инфраструктурни проекти во Северна Македонија.
Оваа соработка беше зајакната и од двајцата премиери на Берлинскиот процес што Велика Британија го организираше во октомври оваа година. Дополнително, двете земји соработуваат преку Заедничката работна група за миграција за борба против нерегуларната миграција и организираниот имиграциски криминал, зајакнување на безбедноста и справување со криминалните мрежи. Ние цврсто стоиме зад нашиот сојузник во НАТО, Северна Македонија, за да го унапредиме просперитетот, безбедноста и економскиот раст“, информираше Британската амбасада.