Пациенти од Онкологија се јавиле во Обвинителството со сознанија за истрагата

Дваесет пациенти кои се лекувале на Онкологија телефонски се јавиле во Обвинителството да помогнат во истрагата со свои сознанија. Тим обвинители извршиле распит на повеќемина вработени на Клиниката, како и на двајца експерти.

Оттаму велат – обезбеден е обемен материјал и документација и цврсти докази, кои се предмет на анализа. Се врши и проверка на медицинските истории на 40-ина пациенти.

„Се извлекуваат податоците со истории за третманот на групи пациенти кои примале биолошка терапија на клиниката, како и медицински истории на уште околу 40- тина пациенти за кои се врши директна проверка на податоците за лекувањето. Основното јавно обвинителство-Скопје формираше тим од експерти кои вршат анализа на целокупното економско- финансиско работење на Клиниката, како и анализа на податоците од здравствените истории на пациентите“, велат од Основното јавно обвинителство.

Ќе се бараат податоци од надлежните органи во Косово и во Албанија за пациенти кои се лекувале кај нас, како и евентуални сознанија за илегална препродажба на лекови за третман на онколошки пациенти во тие земји. Обвинителството во истрагата ќе ги вклучи и ревизорите кои го изготвиле ревизорскиот извештај и ги констатирале состојбите.