Уредникот на „Радио Лидер“, Љупчо Златев, јавно апелираше до Воената академија „Генерал Михаило Апостолски“ да го преиспита статусот на универзитетскиот професор Петар Богојески, по неговите изјави во врска со жените, семејното насилство и потребата од „машки надзор“, дадени за време на дебатна емисија на телевизија „Алфа“.
Богојески, кој е и лидер на „Македонски концепт“, за време на дебатата тврдеше дека реакцијата на сопругот по неверството на неговата сопруга претставува заштита на неговото достоинство, а не насилство. Тој исто така изјави дека феминизмот ги навел жените да го отфрлат секаквиот „машки надзор“.
Богојески беше остро критикуван и од пратеничката на СДСМ, Славјанка Петровска, а неговите коментари беа осудени и од Агенцијата за медиуми, како и од Мрежата за заштита од дискриминација. По реакциите, Богојески изјави дека, во однос на неговата изјава за машка контрола врз жените, останува на ставот оти на секоја жена ѝ е потребна машка поддршка, а на секој маж – женска грижа.
„Традиционалното семејство е она што ќе ја спаси нацијата“, додаде тој.