Поддржувачите на ДУИ потврдија преку фотографии на социјалните мрежи дека дошле со авион во неделата за да гласаат на изборите во Брвеница. Пред неколку дена, на социјалните мрежи кружеше апел со кој се повикуваше етничката албанска дијаспора, како што беше истакнато, да ја земе својата судбина во свои раце, да се мобилизира и да се упати кон гласачките места.
„Актуелната ситуација во нашата општина ги надминува обичните политики и, повеќе од кога било, бара единство, мудрост, акција и зрелост. Чувствуваме национална, верска и граѓанска должност да апелираме до сите жители на нашата општина масовно да излезат на гласање во недела“, се вели во апелот објавен на Фејсбук страницата „Shoqata per f. Cellopek – Zvicer“.
Во неделата, на истата страница беа споделени фотографии на кои се гледаат преполни авиони со гласачи од дијаспората кои се враќаат откако гласале во Брвеница.