Малолетник бил физички нападнат од група негови врсници во скопската населба Влае, при што бил употребен и тврд предмет, соопшти Министерството за внатрешни работи. Случајот во полиција го пријавила мајката на нападнатиот малолетник во неделата попладне. Според полициските информации, се преземаат оперативни мерки за целосно расчистување на инцидентот.
Според пријавата, нападот се случил нешто по полноќ во неделата, а дел од напаѓачите му биле познати на оштетениот.
„На 18 октомври 2026 година, во 15:30 часот, 39-годишна жена пријавила во Секторот за внатрешни работи Скопје дека околу 00:30 часот, на територијата на Влае, нејзиниот малолетен син бил физички нападнат од група малолетници, од кои некои ги познавал, при што бил употребен и тврд предмет“, наведуваат од МВР.
Неколку медиуми објавија дека во инцидентот учествувале околу 15 малолетници. Според неофицијални информации, момчето се здобило со тешки повреди, меѓу кои и скршени заби.