Во саботата во Скопје, одговарајќи на новинарски прашања за церемонијата во Софија по повод предавањето на посмртните останки – за кои се верува дека му припаѓаат на цар Самоил – од страна на Грција на Бугарија, премиерот Мицкоски изјави дека ова прашање треба да се гледа низ призмата на Договорот од Блед. Тој истакна дека тој договор бил постигнат веднаш по капитулацијата на фашистичка Бугарија, која за време на Втората светска војна ја имала окупирано територијата на денешна Македонија.
„Што се однесува до пренесувањето на моштите, јас би се вратил назад неколку децении кога моштите на македонскиот великан Делчев, како резултат на тој Бледски договор, се донесени во Скопје. И тоа е нешто што треба нас како Македонци да нè прави горди, затоа што моштите на тој великан, којшто бил во свое време пред времето, симболизираат многу за македонскиот идентитет“, посочи Мицкоски.