Во врска со случајот со водата во Гостивар, Министерството за здравство во понеделник соопшти дека епидемиолошката состојба во градот останува стабилна и дека континуирано се следи од страна на надлежните здравствени институции.
На 2 август се регистрирани вкупно 84 првични прегледи, што е зголемување од 27 повеќе во споредба со претходниот ден, кога беа евидентирани 57 прегледи. И покрај дневното зголемување, како што наведува Министерството, бројот на прегледи останува значително помал во споредба со врвот на 18 јули, кога беа регистрирани вкупно 649 прегледи.
Експерти од Скопје вршат хиперхлорирање на водата, каде што е откриена бактеријата pseudomonas aeruginosa. Во меѓувреме, тимови од Агенцијата за храна и ветеринарство заедно со Институтот за јавно здравје земаат нови примероци за тестирање. Додека не се докаже дека е бактериолошки безбедна, забраната за пиење на водата останува на сила.