Во понеделникот ДУИ одговори на коментарите на премиерот Христијан Мицкоски дека има информации според кои ДУИ ќе преземе чекори за дестабилизација на државата.
„Без коментирање на политичките спинови и блефови, сакаме да разјасниме дека имаме мандат и одговорност од албанските гласачи да го заштитиме легитимитетот, политичката волја и достоинството на гласот и албанскиот народ во земјата.
Ќе ги преземеме сите демократски мерки и средства да го спречиме понижувањето и надгласувањето на Албанците со наметнување вазали.
Што се однесува до неоснованите обвинувања за прекршување на законите, уште еднаш ги повикуваме партиите да ги проверат сите носители на јавни функции со меѓународна помош. Само така ќе заврши блефирањето, ловот на вештерки и злоупотребата на борбата против корупцијата за политички цели“, велат од партијата.
Реакција дојде и од лидерот на СДСМ, Венко Филипче, кој рече дека доколку Мицкоски каже некаква информација за потенцијална дестабилизација или нарушување на мирот во државата, мора итно да ја сподели со надлежните институции.
Ако не, додаде Филипче, станува соучесник или политички фактор кој можеби има интерес во таа ситуација.