Мицкоски во понеделникот, одговарајќи на новинарско прашање во врска со изјавите на претставникот на Форумот за образовни промени, Бленди Ходаи, за субвенционираниот студентски оброк, рече дека е непријатно изненаден и шокиран од начинот на кој, како што оцени, биле навредувани редовните професори. Тој посочи дека и тој како премиер и министерката за образование и наука Јаневска биле редовни професори и дека низ годините им помогнале на многу генерации студенти да се стекнат со знаења потребни за животот.
Мицкоски изјави дека жали што Ходаи не присуствувал на средбата за студентскиот оброк со легитимните претставници на студентските движења. Како одговор, Ходаи иронично го праша Мицкоски дали треба да му се обраќа како премиер или како професор, посочувајќи дека секогаш кога бил критикуван за неговата работа како премиер, тој се повикувал на неговото професорско звање. Исто така, Ходаи го покани Мицкоски на дебата во Старата скопска чаршија.
Ходаи, кој е поранешен претседател на Унијата на средношколци, во петокот реагираше на сумата која се доделува за оброци на учениците. Тој рече дека пратениците и владините функционери треба самите да покажат како може да се помине со дневницата што им е достапна на студентите.