ЕУ вложува нови напори за одблокирање на европската интеграција на Северна Македонија. Патот натаму води преку Софија и ќе започне уште следната недела, за што се договорија претседателката на Европската комисија, Фон дер Лајен, и премиерот Мицкоски за време на нејзината посета на Скопје во петокот. Фон дер Лајен изјави дека дури потоа Северна Македонија ќе може да добие патоказ.
„Можам да го потврдам она што штотуку го кажа премиерот – дека се договоривме да го направиме првиот нов чекор следната недела, за да се обидеме да го одблокираме процесот и да го придвижиме. Тоа е најважниот дел од сето ова“, рече претседателката на Европската комисија.
„Добив информација дека следната недела нашиот министер за надворешни работи и надворешна трговија веќе ќе биде во Софија. Причината за тоа е Коридорот 8 и проектите што ги реализираме во неговите рамки, па сакаме да побараме билатерална средба со домаќинот. Веднаш побарав од министерот да испрати дипломатска нота и да побара термин за средба со неговиот колега, за да можеме да започнеме и некако да го придвижиме процесот напред“, изјави Мицкоски.