Во петокот, во рамките на новата постапка поврзана со пожарот во Кочани, Кривичниот суд го прифати барањето на Обвинителството и одреди 30-дневен притвор за Дејан Јованов, сопственик на „Пулс“, кој е осомничен за давање поткуп на службеник од Министерството за економија со цел да обезбеди дозвола за работа на угостителскиот објект.
Како основи за барањето притвор, Обвинителството ја наведе опасноста од бегство, како и фактот дека против Јованов веќе се води кривична постапка во врска со главниот предмет. За кривичното дело „давање поткуп“ е предвидена затворска казна од една до десет години.
Од Обвинителството исто така соопштија дека против службеникот осомничен за примање на поткупот веќе е поднесено обвинение и тој се соочува со судска постапка. Адвокатот на Јованов ќе поднесе жалба на одлуката за притвор.