ЕУ ќе им понуди пристап до единствениот пазар на земјите-кандидати, под услов тие да се согласат да застанат на страната на блокот против непријателски настроени држави и индустриски ривали, се наведува во нацрт-предлогот на Европската комисија до кој дојде „Политико“.
Според нацрт-планот, на земјите-кандидати – од кои некои со децении чекаат да станат членки на ЕУ – ќе им биде понудена досега невидена „постепена интеграција“ во единствениот пазар, вклучувајќи трговија без пречки и пристап до истражувачки програми, додека се работи на нивните барања за членство.
„Единствениот пазар е прв приоритет за економско приближување“, се вели во прегледот на придобивките од фазата пред проширувањето што ќе им бидат понудени на земјите-кандидати, додава „Политико“ во својот извештај.
Премиерот Мицкоски во средата повтори дека Владата е подготвена за разговор со претседателката на Европската комисија, Фон дер Лајен, во Скопје, додавајќи дека аргументите се веќе добро познати и непроменети.