Во вторникот, одговарајќи на новинарско прашање за претстојната посета на претседателката на Европската комисија, Фон дер Лајен, Мицкоски изјави дека присуството на претставници од ЕУ би било корисно за постигнување ефект во преговорите со Бугарија. Фон дер Лајен ќе се сретне со претседателката Силјановска Давкова и со премиерот во Скопје, на 2 октомври.
Според Мицкоски, разговорите со претседателката на Европската комисија ќе се фокусираат на моменталната состојба со процесот на проширување, како и на предизвиците што се појавиле и оние што претстојат. Одговарајќи на друго новинарско прашање, премиерот истакна дека во регионот, во ЕУ и во светот се одвиваат бројни случувања кои служат како показател за тоа како државата треба да ги обликува своите политики и планови.
Прашан за извештајот на „Политико“, според кој Албанија, Црна Гора, Украина и Молдавија ќе добијат патокази, Мицкоски изјави дека не располага со такви информации.