Компјутерскиот техничар осомничен во шпионажата всушност бил пензионер кога било објавено дека препишувал датотеки од компјутер во кабинетот на претседателката Силјановска Давкова, потврдија за Телма два извори запознаени со ова прашање.
Осомничениот бил припадник на единицата „Волци“ на Армијата, каде што служел како подофицер одговорен за врски и комуникации. Тој бил преместен во Кабинетот во времето кога генералот Васко Ѓурчиновски бил тогашен аѓутант на претседателот Иванов. Осомничениот ја имал истата позиција во Кабинетот на Пендаровски.
Тој работел во Кабинетот на претседателката Силјановска Давкова како надворешен консултант, додека неговата формална работа била во специјалните сили на Армијата, каде што има забрзана шема за пензионирање. Поради ова, тој се пензионирал, но бидејќи не можело да се добие одобрение за ново вработување од Министерството за финансии, осомничениот продолжил да работи за Кабинетот на претседателот дури и како пензионер.
Сепак, на 24 ноември 2025 година, пензионираниот ИТ службеник предизвикал инцидент што бил пријавен еден месец подоцна во Министерството за внатрешни работи, по што била отворена истрага.