Министерот за надворешни работи Тимчо Муцунски, информира дека се спроведува постапка за наводна злоупотреба на јавни буџетски средства од страна на поранешниот амбасадор Љубомир Фрчкоски.
„Имаме сериозни индиции за злоупотреба на јавни буџетски средства. Индициите укажуваат дека штетата е шест цифри во евра. Не би можел конкретно да кажам колкава е во моментов, давам одредени информации кои смеам да ги споделам во оваа фаза, зашто тече процедурата.
Спроведена е внатрешна постапка во МНР, информациите кои стигнаа до мене се навистина многу загрижувачки. Ние ќе ги преземеме сите неопходни мерки, а понатаму ќе имаме обврска да ги информираме релевантни институции од правосудството, но што ќе преземат тие излегува од наша надлежност и преминува во нивна надлежност,“ изјави Муцунски на прес-конференција.
На новинарско прашање за можни тужби од засегнатите лица, Муцунски истакна дека тоа е нивно право.
„Јас тука ништо не можам да спорам, но сум убеден дека откако МНР е раководено од моја страна внимаваме секогаш максимално да се почитуваат законите и процедурите, што, за жал, морам да констатирам, не било пракса додека ова Министерство било раководено од мојот претходник. Најеклатантен пример е последното отповикување на генералниот конзул во Њу Џерси каде лицето било именувано на таа позиција спротивно од одредбите на Законот. Таква пракса не смееме да дозволиме, треба да бидеме репер за почитување на законите,“ додаде министерот.
Муцунски информира дека во постапка се различни случаи со амбасадори, меѓу кои и ситуацијата со Фрчкоски, кој по сопствена одлука поднел оставка откако бил повикан на консултации. Дополнително, тој нагласи дека постои специфична процедура за амбасадорите Андреј Жерновски и Весел Мемеди, како и дека некои дипломати се редовно отповикуваат по истекот на мандатот.
Министерот најави дека сите клучни амбасадорски позиции ќе бидат пополнети во најкраток можен рок, со цел до 2025 година да бидат покриени сите дипломатско-конзуларни претставништва.