Вратите на институцијата се отворени, соопшти Министерството за енергетика во врска со извештајот на Институтот за демократија

Новоформираното Министерство за енергетика, рударство и суровини веќе се соочи со предупредувања за корупциски ризици.

Според Институтот за демократија, кој го вклучи алармот, важноста на енергијата и државните природни ресурси, како и големите финансиски придобивки за концесионерите во тие области, ги прават таквите министерства подложни на ризик, дури и во земји со добро развиена антикорупциска политика.

Имајќи ги предвид парите во сферата, Институтот го повика Собранието да посвети посебно внимание на три потенцијални извори на корупција поврзани со работата на Министерството, а тоа се зголеменото странско и домашно лобирање, конфликтот на интереси и слабите човечки и материјални ресурси во рамките на Министерство.

Министерството со кое раководи Сања Божиновска соопшти дека ги поздравува сите иницијативи кои носат поголема отчетност и транспарентност во областа на енергетиката, додавајќи дека вратите на институцијата се отворени кога станува збор за следење на нејзините активности.