Коцевски и Јаневска го критикуваат предлог-буџетот

Републичкиот јавен обвинител кажа дека основните средства за функционирање на обвинителствата се намалуваат за повеќе од 1 милион евра од првично предвидените за годинава.

Според него, со ваквото кратење се доведува во прашање редовната работа на јавните обвинителства.

„Намалување на средства се предлага во речиси сите ставки, вклучувајќи ги и парите предвидени за истражни дејствија, за вештачења и анализи, за одржување на возила потребни за увид. Во целиот регион не постои држава која помалку вложува во обвинителството од нашата“, изјави Љупчо Коцевски, државен јавен обвинител.

Низа забелешки упати и судско-буџетскиот совет.

„Не се обезбедени средства за исплата на додатоци на плати на вработените во судската власт што е законска обврска. Во претходниот период се обезбедуваа додатоци на плата најчесто во висина од 10%, ова се додатоци само за администрацијата, па необезбедувањето на средствата за додатоци ќе има сериозен негативен ефект кај вработените“, изјави Силвија Јаневска, судско-буџетски совет.