Самит на ПСЈИЕ: Прес-конференција на Силјановска Давкова и колегите

По завршувањето на Самитот на шефови на држави и влади на Процесот за соработка во Југоисточна Европа (ПСЈИЕ), во четврток во Скопје, претседателката Гордана Силјановска Давкова и нејзините колеги, црногорецот Јаков Милатовиќ и албанскиот Бајрам Бегај, чија земја е новиот носител на Претседателството на ПСЈИЕ одржаа прес-конференција.

„Свесни сме дека има замор од проширувањето, но има уште поголем замор од чекање. Затоа, во својство на претседавачи со ПСЈИЕ, ги охрабрувам европските партнери да останат доследни, кредибилни и принципиелни кон европската идеја и кон големата визија за обединет и отворен континент“, рече таа.

Според Милатовиќ, „за нас е важно да останеме на курсот на демократскиот развој и владеењето на правото бидејќи само на тој начин нашите општества можат да напредуваат во можноста што ја дава разбудениот ентузијазам и новиот моментум во Брисел за проширување“, тој нагласи.

Неговиот албански колега Бегај рече дека неговата земја како претседавач ќе остане проактивен поддржувач на регионалната соработка.