Таравари разрешен: Зијадин Села повторно претседател

Кулминира играта на тронови во Алијансата за Албанците. Конгрес свика и партиското крило на Зијадин Села. Тој го разреши актуелниот лидер Арбен Таравари и повторно стана претседател на Алијанса.

Порача дека „секоја друга информација што кружи, различна од нивната е лажна со обид за измама и дефокусирање на членството“.

Оваа иницијатива на Села доаѓа како одговор на конгресот од Арбен Таравари на кој делегатите кои учествуваа ја потврдија кандидатурата за претседателски кандидат. Претходно пак, токму Таравари преку објава на Фејсбук отворено го покани лидерот на ДУИ, Али Ахмети да ја објави и тој својата кандидатура за претседател. Го покани и на тв дуел.

По одржувањето на Конгресот на Зијадин Села, нема коментар од Арбен Таравари за конгресот од крилото предводено до неговиот сопартиец Села и неговата евентуална смена. Членството е тоа што назначува и разрешува претседател, рече Села.

Инаку, Конгресот на Села се одржа во Скопје, а покрај одлуката за претседателска смена во партијата, се зборуваше и за настапот на изборите.