Мицкоски ја критикува Владата за најавата за амандмани на Законот за амнестија

Допрва доаѓаат тешките денови за Македонија, кога станува збор за спорот со Бугарија, но затоа требаше да мислат оние кои го прифатија анексот во Договорот за добрососедство, а отворањето на Уставот е пандорина кутија.

Ова е коментарот на лидерот на ВМРО-ДПМНЕ, Христијан Мицкоски по изјавата на министерот Османи дека е прилично сигурен оти Бугарија постојано ќе формулира нови барања кон нашето зачленување во Европската унија. Требаше да мислат и бирократите од Брисел за тоа што нашите политичари прифаќаат-нагласува Мицкоски. „Јас верувам во добрите намери на нашите стратешки пријатели, верувам во добрите намери и на Вашингтон и на Брисел и на Лондон и на Париз и на Берлин и на Рим и останатите, но не можам да верувам во добрите намери на официјална Софија, а за жал договорот којшто го прифатија е тотално асиметричен и е во согласност со бугарските позиции целосно коишто се ништо друго освен вековниот руски интерес на Балканот“, нагласи мицкоски.

За најавата на премиерот Ковачевски дека социјал-демократите ќе поднесат амандмани на Законот за амнестија, лидерот на опозициската ВМРО-ДПМНЕ коментира дека е скандалозно што во Владата најверојатно премиерот не ги чита законите кога се разгледуваат. Не може премиер на штотуку излезен Закон од влада да најавува амандмани во Собрание-заклучува Мицкоски.