Ковачевски: Ние сме подготвени за ЕУ, следува напорна и посветена работа на реформи

Претседателот на Владата на Република Северна Македонија Димитар Ковачевски вечерва организираше прием по повод отпочнување на преговорите на Република Северна Македонија со Европската Унија. На средбата на која беше присутен државно-владиниот врв, пратениците, амбасадорите на земјите членки на ЕУ, политички чинители, претставници на граѓанското општество, на медиумите и стопанственици премиерот Ковачевски се обрати пред присутните. Неговото обраќање ви го пренесуваме интегрално.

„Ви благодарам на сите за присуството вечерва, заедно да го прославиме официјалното отпочнување на преговорите на Република Северна Македонија со Европската Унија.

Би сакал да започнам со честитка за граѓаните. Конечно, после 17 години, се отвора процесот за прием на Северна Македонија во големото европско семејство. Вчера, отворивме ново поглавје во македонската историја. Европско поглавје кое ќе донесе забрзан развој, просперитет и стабилност.

Тука, би сакал да им се заблагодарам на граѓаните, за нивната истрајност и визија за европска иднина од која не се откажаа. Тие се најзаслужни што ние денес сме тука кај што сме. Тие не се предадоа пред ниту еден предизвик за да го исполнат својот сон да бидат дел од европското семејство.

Тука вечерва се присутни и Претседателот на државата, Претседателот на Собранието, пратеници, министри, политички чинители, претставници на граѓанското општество, на медиумите, стопанственици, и други чинители кои го дадоа несебично својот влог во процесот кој кулминираше во вчерашното отпочнување на преговорите.

Овој пат не беше лесен, и за тоа сите сме свесни, и затоа, искрено ви се заблагодарувам на сите вам, за несебичниот ангажман, заложба и поддршка и ве охрабрувам да останете исто така ангажирани и во наредниот период. Вашата поддршка ќе е од непроценливо значење и понатаму, особено што сега треба да ги вклучиме сите расположливи капацитети и да работиме исклучително посветено за да можеме да ја имаме најбрзата можна интеграција во Европската Унија.

Драги пријатели,

Имавме многу предизвици, но како што кажав и вчера, ние решивме да се соочиме со сите наши стравови и да донесеме храбри одлуки за иднината, и да не останеме заложници на минатото. Решивме да бидеме одлучни, храбри, мудри и несебични, да не мислиме на нас, туку на идните поколенија, да мислиме на нашата држава и на мирот, безбедноста, стабилноста и иднината.

За мене највисока форма на патриотизмот е носењето државнички и прогресивни одлуки, имајќи притоа јасна визија и план за иднината, и искрена заложба за просперитет на државата и на сите граѓани. Тоа е најчистата и најискрена форма на почит и љубов кон татковината.

Водени од тој принцип на патриотско и државничко однесување, ја донесовме и конечната одлуката со која обезбедивме зачувување и зацврстување на македонскиот идентитет, македонскиот јазик, култура, и посебност, а воедно обезбедивме и почеток на преговорите.

Ве уверувам, а и тоа го потврдија на повеќе наврати и високите претставници на Европската Унија и тука дома кај нас, но и вчера во Брисел, дека нашите позиции се зачувани и потврдени. Европската Унија нѐ прифаќа како Македонци кои говорат македонски јазик со безусловно почитување на достоинството и посебноста на македонскиот народ и неговите, идентитетски, историски и културни особености. Бевме јасни и гласни, дека за овие нешта ниту се преговара, ниту ќе се преговара.

Претседателката Фон дер Лајен, вчера јасно и недвосмислено ја поддржа нашата позиција и нѐ увери, исто како што тоа го направи тука во Собранието, дека нашиот македонски јазик ќе биде вреднуван и почитуван и понатаму, а воедно и ќе доживее развој и промоција преку неговото користење како еден од официјалните јазици на Унијата по нашето полноправно членство.

Нашиот идентитет, не само што ќе биде заштитен, истиот и ќе се збогати и ќе го збогати комплексниот Европски идентитет, како и што во својот говор вчера истакна и високиот преставник Борел. Она што нѐ дефинира нас, нашите особености, специфики, традиција, култура, обичаи ќе бидат автентично наши, македонски, но споделени со сите наши пријатели во Европската Унија. Тоа е она што и нас и Европската Унија ќе нѐ направи побогати.

Вчерашниот ден беше историски. Знам дека неколкупати го споменавме овој збор, но навистина е така. Во историјата на секоја држава, има неколку решавачки моменти, а вчерашниот беше токму таков.

Вчера, пред 27 земји членки, опкружен со поддршка од нашите европски пријатели, ја имав огромната чест, во име на граѓаните, да зборувам на мојот мајчин македонски јазик во Советот на Европската Унија и да ја искажам нашата јасна и цврста сегашна позиција, но и нашата визија за иднината.

Поддршката која вчера во салата ја добивме назад од сите земји членки на Европската Унија, а особено на земјите членки од регионот, ни дава потполно право да сме полни надеж и уверени дека од сето ова, сите ние заедно ќе излеземе посилни, постабилни и забрзано ќе чекориме напред кон заедничка поперспективна иднина. Лично сум убеден дека граѓаните од ова ќе излезат како победници.

Кажав и вчера, ќе кажам и денес. НИЕ СМЕ ПОДГОТВЕНИ ЗА ЕУ.

Нашата земја е Европа во мало. Ние го живееме мотото на Европската Унија секојдневно. Ние сме мултикултурно и мултиетничко општество, обединети сме во нашите различности, се гордееме со нив, тоа е она што нѐ прави посилни. Сега останува да ја операционализираме таа подготвеност и забрзано да зачекориме напред. Доаѓа периодот на напорна работа. И мене лично ме радува тоа. Од денес почнува нова страница на напорна и посветена работа на реформи, на усогласување на нашето со европското право, на економски, политички, општествен развој, повисок квалитет на живот, високи стандарди за почитување на владеењето на правото.

Верувам дека и континуираната и зголемената помош која Европската Унија ќе ја обезбеди во наредниот период, ќе овозможи македонските граѓани и економија да добијат конкретна и реална поддршка. Особено е важно европската реалност да ја живееме и денес.

Почитувани,

Се затвори едно поглавје, и отвораме ново.

Затоа, сега е времето кога треба да застанеме заедно, обединети, полни оптимизам и верба за подобро утре, за да можеме да ги здружиме силите и заеднички да се посветиме на развивање силна, успешна и просперитетна европска држава.

Сега е време за храброст, посветеност и јасен поглед кон иднината за да можеме брзо и одлучно да го оствариме и сонот на нашата генерација, но и сонот на Илинденците и борците од НОБ. Да се обединиме и да застанеме заедно, бидејќи само заедно сме посилни. Посилни и поподготвени да ги премостиме сите предизвици кои стојат пред нас на нашиот пат кон полноправното членство и нашата европска иднина.

Нека ни е среќен почетокот на пристапните преговори, да продолжиме да бидеме вредни, квалитетни и полни со разбирање за различностите, да ги споделуваме европските вредности и сите заедно да се радуваме и на полноправното членство на Република Северна Македонија во Европската Унија што поскоро!

Ви благодарам“.

Leave a Reply

Your email address will not be published. Required fields are marked *

*